خانت عقارب ساعتي - عبدالله بن حجاب

خانت عقارب ساعتي والدغتني
وانا ليا مني نويت ابتعد جيت

لأصدق عيون بالغرام اذرفتني
دمع يطيح وينبني بالحشا بيت

للروعه اللي بالقصيد اكتبتني
وانا كتبت الها القصايد وهجيت

بيبان خفاق عليه اتعبتني
سود الليالي بالتعب والتناهيت

اللي ليا ضاق الزمان ادفعتني
له في مهب الريح للريح واقفيت

على ذلول من القلق رافقتني
وانا مرافقها من سنين وازريت

اني احل عقالها وارمعتني
وبركت حيران الاماني وفليت

حبل الرجا يوم الدروب اخذلتني
وقلت الوعد ياصادق الوعد واوفيت

وذابت شموع الذكريات وبكتني
دمعه واخون احساسها لو تخليت

عن حبها اللي والعيون سكنتني
غلا وليا مني نويت ابتعد جيت

© 2024 - موقع الشعر