إنت وضميرك

تخطي وأقول .. إن أنا المخطي ولا أتشرّه !
وتخطي بعد .. وأعذرك وآقول مايدري

وفي كل طاري .. يمر تخطي كذا مرّه !
وأخاف حملي يزيد .. وينكسر ظهري !

جايز .. اكون الحليم اللي ظهر شرّه
وجايز يكون الغلط مني .. وذا عذري .

يا صاحبي كنت أحبك حيل بالمره
ولازلت أحبك .. ولكن العتب يطري

أحيان أشوفك " بعيد وخايف آضره "
وأحيان أشوفك قريب .. إرتاح في صدري

ليه أسألك عن جروح القلب .. والحرّه
وانت أبخص الناس في جرحي وفي حري

يا صاحبي .. لو مسك كل ٍ على سرّه !
ما كان الأحباب .. سموا حبهم " عذري "

وأنا تعبت أسحب الأحزان .. وآجره
وأحفر بأثر جرتي .. قبر يغدي قبري

إما تكون الحبيب اللي قرب مرّه
ولا عسى الله يقدرني على صبري

وأنا أحبك .. ولا بآعاود الكرّه
حتى ولو كبريائك .. صار يستجري

مإخترتك تذوق حلو بكاي أو مرّه
إخترتك .. تحس بأحلى شي في عمري

فلا تكابر .. وأنا ماعاد بأتشره !
وإنت وضميرك .. وفكر قبل لا تسري