منصور سميتك - عامر بن نوطان

سبب تسميته أحد أبنائه (منصور) مع
أن آل جابر ليس بهم اسم منصور

منصور سميتك على منقع الجود
اللي الصفات الطيبة من صفاته

اللي يلوذ بجانبه كل مضهود
عون الضعيف اللي يهل اعبراته

شيخ على كل الرجا جيل به زود
كريم بلا ما تعدا حسناته

يالله ياللي بالورق تكسي العود
ياللي لك المخلوق يحسن صلاته

تحفظ لنا منصور يا مجري النود
يا من سمكت العرش طول حياته

منصور بن مناع له الطيب مشهود
جزل عطاه وعارف موجباته

ما هوب من يرث حزازات والهود
ولا على الادنين يرفع قناته

شيخ على بيته لهم صدر وورود
ما هوب من زادت جنونه غناته

في كل عمره ما وطا درب منقود
عن كل عيب مثبتين براته

اللي تباشر به هل الضمر القود
ما عاد منهم من يسوق بعصاته

ما دام أبو مانع على الأرض موجود
كل الدهر ما اهتم بمخلفاته

شيخ الشيوخ اللي لنا زند وعضود
مهابته تدار وتحفظ وصاته

رجل الرجال اللي رقينا به سنود
محد من الشيخان سوى سواته

© 2024 - موقع الشعر