يا ضريف الطول

يا ضريف الطول برّاق الثنيّه
والشعور منقّضاتٍ ما جدلها

والخدود مورّداتٍ تحت فيّه
فيّة رموشٍ تدنّى من خجلها

ان مشت تمشي على القاع برويّه
لو تشد السير كنها في مهلها

ان لفا الخطّاب صوبش يا صبيّه
كل واحد عزوته تشهد لهلها

اجمحي عن واحدٍ خلاّ خويّه
يشتكي ميلات حضّه ما عدلها

الخوي ان كان من قومٍ شليّه
يفرح المضيوم لامنّه وصلها

وفيه من جدّانه عزومٍ قويّه
صيحته ناصل لها ما قد دبلها

نرتكي لحموله و ننهض سويّه
يوم نفسك يالردي بيّن خملها

المراجل ما تجي ابن آدم عطيّه
يتعب الرجال قبل انّه يصلها

تبغي الرجال ابو عزومٍ قويّه
لو تعلّت غاربه قام ونقلها

ما تبي رجّال له نفسٍ رديّه
لا بغت تتبع هواها ما عذلها