حــب كـــوع - طالب ال عذبه

عشت بالدنيا وانا ماسرت في درب الضياع
ماينور لي طريقي غير انوار الشموع

ربي ألهمني من الخاطر مساحاتٍ وساع
لجل أقدر آصل الفكره على الراي القنوع

ربي أنك لاتلبسني مع العالم قناع
وربي انك لاتزيد القلب في همٍ وروع

مابه أصعب من دموع الرجل في لحضة وداع
ومابه اصعب من وداعك غير تسييل الدموع

والله انّي ماهقيت ان هذي الدنيا متاع
لين شفت الزين قفّى دون يعلن بالرجوع

لاتلومون المفارق من شكاوي الإلتياع
مايصيد اللوم رجلٍ علته بين الضلوع

وش يسوي من فواده من هموم الزين شاع
وماقدر يطفي جحيمٍ شاع والدنيا تلوع

لو همومي ترتكز في ساعد الرجل الشجاع
عاش في ذلّ ومهونه بين تعزير وخضوع

غير ربي حط لي صبرٍ يهد الإنقطاع
والصبر كنزٍ ثمينٍ لو يزيد الرجل جوع

كل نفسٍ حملها دايم بقدر المستطاع
ولو يزيد الحمل ذرّه أودت بدرب الوقوع

ياوليفٍ علم بعده من لسان الغير ذاع
أسألك بالله ترجع قبل ماتدعى قطوع

جرح بعدك في فوادي ياصل لتسعين باع
واصبح وصالك مثل قول المثل لي (حب كوع)

مادريت انك على قلبي مكلّف وانت راع
كلنا راعٍ على الثاني ومسؤولٍ وطوع

انت لك حقك علي واخذه على طاع وسماع
وانت حقي في ضميرك كون لي طوع وسموع

لاتخلي قلب عاشق في هوى عينيك جاع
ماتقبّل أي عذرا لجل يصبح لك جزوع

يمسي وحبك بقلبه مايحدد او يباع
ويصبح وحبّك بقلبه عاش في حالة طلوع

يرتفع حبك وياصل قمته بالإرتفاع
كنه ناوي يمتلك درب المحبه في سبوع

نال لجلك قمة العشّاق من دون إنتزاع
وان لفاه احدٍ ينازع قلبي لعينك نزوع

صار حبك في فؤادٍ مظلمٍ نور وشعاع
الأمل كله تعلّق فيه ..من غيره يجوع

لو يزيد الحمل فيني ذرتٍ فالقلب زاع
اطلبك ترجع قبل قلبي من فراقك يزوع

عشت من دونك على طاريك فايام الوداع
وكل ماطرّاك عقلي امطرت عيني دموع

© 2024 - موقع الشعر