يالمجلس اللي تجمع

اسلم وسلم لي على طيب لأفعال
صدق الفعول اللي عليها التكانه

يحري بها رجّال من دون  رجّال
عزيز قوم وما رضي  بالاهانه

لا هو ولد عمٍّ ولا هو   ولد     خال
حرّ شلع بالجو وأعلى  مكانه

يخفق بجنحانه ومخلبه قتّال
ضربه  مكن بالصيد يفلج سمانه

ما ضامه الا الوقت واسرف به الحال
عزي لمن شاف الغبن من  زمانه

تبدلت به كل  لاحوال  بأحوال
وفيه استوى عالي المكان وطمانه

من شاف ما شافه يجي عقله هبال
هني مجنونٍ  شطح به   جنانه

مجمع وجيهٍ   بالضغينات تشتال
نار الحقايد    بالصدور  اختزانه

يالمجلس اللي تجمع الوان واشكال
ما أنصاك  لو   ناصيك  تملي ثبانه

ما دمت منصى  للهلايم  والأنذال
ما بيني وبينك وداد  وميانه

قومٍ على المكشوف تضحك وتختال
رجالهم بالهرج  يذرع لسانه

وان عودت للجد مافيه  مثقال
من المراجل  والظفر والرزانه

ما دام فيك الحق معدوم ومحال
ويشرع بك الباطل ومرفوع شانه

يحرم علي مقلاط سطك ومدخال
نفسي عزيزه  مالها فيك  خانه

لابد يا دنيا العنا لك من أقبال
بوجهك الضاحك ورد  الأمانه

طبع الفتى يبرك وللحمل يشتال
ما يرتخي عزمه ولا  عنفوانه

اسرج حصان العز  ما دمت خيال
من يمتطي  للعز صهوة حصانه