سلّم على اللي دنيته كله افلاس

سلم على اللي دنيته كله افلاس
لا شال قنطارٍ ولا شايل افلوس

من شاف حاله قال فاهم وسياس
وهو على مشية خطاويه مسيوس

يدخل تجاره ثم يشري وينحاس
ما يدري انه طار حظه ومنحوس

وان جا يبي يغرس مع الناس غراس
مابه مكان الا ويلقاه مغروس

وان شدّ يطلب له من الخير عساس
في كل دربٍ سار يلقاه معسوس

وان راح للصيد بسهامٍ وأقواس
في كل مره يسحبه يكسر القوس

حتى الرفيق اللي معه كل مجلاس
ما عاد يبغاله له مجاليس وجلوس

وليا بغى نومه وعينه به نعاس
تذكر اهمومه وطارت له نعوس

يسلك طريق الخير مع كل الاجناس
ماله من العالم مثيل ومجنوس

لاهو بكذاب ولاهو بدلاس
ولا تعامل في حياته بمدلوس

راحت علومه بين داين وحباس
في كل يوم داخل السجن محبوس

بعد التفاؤل صار يبدا به الياس
لين اصبح بحاله محطم وميئوس

صارت حياته كلها دون احساس
لا شايفن حظه ولا هو بمحسوس