تغتال الشهيق

جيت والدّمعه تغص بمدمعي
والنّزف ما كفّ بالجّرح العميق

بين وعي وبين حالة لا وعي
أدرك اللي صار من حولي واحيق

رغم حزني ما كسرني موجعي
طير فكري حام واحساسي طليق

الهقاوي لو تناقض واقعي
ما شكيت الحال لا قامت تضيق

يا بنات الفكر ثوري واسمعي
الصّديق اللي من اسبابه غريق

كيف من كفّه أواجه مصرعي
خابرٍ من بيننا عهدٍ .. وثيق

والله ان ارضاه غاية مطمعي
ليه دمي لحظة الغفله يريق

كيف يخلف في مساره والسّعي
كيف ولا كيف هو فعله يطيق

اشهد انّه لاع خفّاقي لعي
والتياعي شبّ في جوفي حريق

والله اني فيه حاشا أدّعي
مزنة ابياتي لمع فيها بريق

كثر الله خير ضيقاتي معي
كلّ يوم آ يطيح من عيني صديق

المواقف زادت الضّايق وعي
لا يأمّن صاحبه ممشى الطّريق

من قتل روح الوفآ خطّ النّعي
والخيانه لابسه ثوبٍ أنيق

خابت احلامي وقصّر طالعي
ليتني أغفى ولا ودّي أفيق

وسامح الله كل طعنه ب اضلعي
واصعب الطعنات تغتال الشّهيق

وجيت والدّمعه تغص بمدمعي
والنّزف ما كفّ بالجرح العميق