اوراق تقويم

هذا الزمن غيّر جميع المفاهيم
اسرار ليله بانت بوجه صبْحه

يفهم مزاجه كل دندون وفهيم
من جرّب اوجاعه وطعنات رمحه

وحنا خذينا من دروسه تعاليم
ولا سلمنا من سمومه وْلفحه

لعبت بنا سود الليال المجاهيم
احزان وهْموم وْ سعاده وفرحه

ما بين حمس الشمس واطلالة الغيم
بانت خسايرنا ولا بان ربحه

واعظم خساره فيه من غير توهيم
قبل ملذاته وذمه ومدحه

اعمارنا اللي كنّها اوراق تقويم
في كل يومٍ ينتزع منه صفحه

ومن دون تحليلٍ ومن دون تحريم
بأعطيك ياللي تطلب العلم لمحه

اعرف ترى الدنيا حظوظ وْ مقاسيم
وْ لا يفيد بعض الناس جمعه وطرحه

لكن الى حدك زمانك على الظيم
وقاسيت ضداته وعسره وْكدحه

اصبر كما صبر الرجال الشغاميم
والحال لا تكثر على الناس شرحه

كم خلف بيبان السجن من مظاليم
وكم من جريحٍ مات ما طاب جرحه

وفالشعر لاهل الشعر حكمه وتفهيم
وْ لا كل ناصح تقبل الناس نصحه