يابو نبطه عساك لسيل دايم
تجيك من غر السحايب وتسقيك
يمطر علٰيك من المزون الدهايم
ينهل هملول المطر لين يرويك
غر المزون مروحات العتايم
تصب فوقك صب وتجري مجاريك
تسيل ضلعانك وكل الخرايم
ويمتلي روضك وتملى محاجيك
يحييك محيي الهميد الصرايم
من عقب موتك باعث الخلق يحييك
عقب المحل نلقى بك السيل عايم
ريح الخزاما هو عطورك ويكفيك
ويطيب كيف معصبين العمايم
ومربعن كلك وتربع ضواحيك
ويفرحون اهل القطيع الهلايم
عقب الهزل تسمن وتدهل مفاليك
يبني عليها من شحمها ردايم
صفرن تسوم باذهب وأزرق الشيك
بطرافك بيوت الشعر والبهايم
ياللي زهيت النبت والنبت زاهيك
مدري تشوف الناس ولا انت نايم
يوم الفراق اللي مهمك ومبكيك
يابو نبطه صحيح ماهي ضلايم
كم واحدن هاجر وروح مخليك
من عقبهم ظايمك من الضيم ضايم
الله يحسن عزاك فيهم ويبقيك
وانته تهظم غاديلك هظايم
شفنا دموعك يوم جينا نعزيك
ياجعلهم لطيبات الختايم
في جنة الفردوس وربك يعافيك
والحي منهم ساكنين القسايم
وانته على باله يعزك ويغليك
يابو نبطه مال المحبين لايم
مايلام من يبكي جنابك وينعيك
مدهل صناديد الرجال الصتايم
نوادر الحرار ماتشابه الديك
راين سديد وقو باس وعزايم
فعول اهلك اليا تذكرت ماضيك
ياما ركبو من فوق حمرآ همايم
فيهن من التيهي عروق وشرابيك
سخاف الرقاب معجلات الهزايم
قد ارقبن جالك وطبن بواديك
قبل يجي لجمس بايع وسايم
اللي لسانه ترست السلف وسويك
ياما نزلوبك كاسبين الغنايم
واليوم خالي كن مادوجو فيك
بس المراح وفوقه الطير حايم
مافيك ناس ولا لقينا حواليك
الا لقينا بينات العلايم
حصاه با المنبر من اثار راعيك
منبر المسجد باسنين القدايم
ماهو بخافيني ولاهو بخافيك
يامسجدن يدخلك مفطر وصايم
الله يرحم يا المشرف مسويك
يامال الجنه عن لهيب السمايم
عودآ سجد برضك وركز مواريك
يالله ياغفار ذنوبن عظايم
تغفر لمي وابويه اطلبك وارجيك
اطلبك يامعبود جالس وقايم
ياغافر الزلات والامر بيدييك
صلو عدد نسناس برد النسايم
على الرسول وجعل مولاك ينجيك
الشاعر:مخلف حسين بن صعيب المطيري
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.