كريم يابرقٍ لعج بالسما فوق

كريم يابرقٍ لعج بالسما فوق
قبل الشفق والصبح يعلن اشراقه

باول نصوبه في مقاديمه بروق
يشدي ثقر من فيه حسن ولباقه

وكن في مواخيره من الوبل دافوق
دمعٍ تدافق بالمحاجر ادفاقه

ليا سقا قاعٍ يطوق الثرى طوق
ويزين في ظرب المسايل اطراقه

وليا غدى سيله مع الدرب مدلوق
قام يتدلّق بالفيافي ادلاقه

يحيي هشيم من لضا القيض محروق
في حزة الكنه يزيد احتراقه

لا قام يروي مع تدفاقه عروق
نبتن جديدٍ باديٍ بانطلاقه

بامر الولي ينبت اخزامه ورقروق
ومرابعن نشفق عليها اشفاقه

وعلى مداهيلٍ يجاوبلها الشوق
من شافهن بيّن عليه اشتياقه

منازل البدوان رعاية النوق
هذي رسومٍ بيناتٍ ارقاقه

بيوتهم عقب التاقطر لها ذوق
مافيهم اللي مبتعد بانشقاقه

ومروبعٍ طرايقه مابه فتوق
ترفع مقاديمه ويضفي ارواقه

مدهل هل الردات نزاحت العوق
زبن الدخيل وللمعادين عاقه

ربعن تسوق الطيب قدامها سوق
لا جا النهار اللي سريع انفهاقه

راح الزمان وبدل الحال برفوق
ولا عاد به شاةٍ ولا عاد ناقه

تبدلت كل المنازل بطابوق
وكلٍ بناله قصر واطلق احداقه

بنيانهم عدى على راس شاهوق
ومجلاسهم تضفي عليه العراقه

وليا حصل لمزارق الطيب زاروق
نلحق على ركب المراجل اللحاقه

نقدّم حقوقٍ وترجع لنا حقوق
ومقدرينٍ ربعنا والرفاقه

مادام مخلوقٍ على راس مخلوق
كلٍ على الدنيا بيعلن فراقه

وصلاة ربي عد مانبت زملوق
على رسولٍ كمّل الله اخلاقه