انا اعيش بمعاناتي مع الذكريات

انا اعيش بمعاناتي مع الذكريات
واللي بقالي مع الايام ادهى وامر
 
ما اعلم المقبلات ، اعلم انا المقفيات
الكون هذا تعاقب فيه شمس وقمر
 
عندي قناعه بأن العمر لو فات مات
ثلثين عمري قضا وانا بصدري جمر
 
يالذة العمر دورتك بأربع جهات
ولا لقيتك بدربي وانت لذة عمر
 
تعال اعيشك حياتٍ ماوراها حيات
ذبحني الازدحام اللي بليا ممر
 
النفس امّارةٍ بالسوء بالمغريات
كم زيّنت في عيوني بيض ويّا سمر
 
تشدني ضحكةٍ من مبسم الفاتنات
وشلون لا خالط المبسم كلام وخمر
 
حبيب عمري تعال ارجوك كلي ثبات
انا عرفتك سحابة ود ماتنهمر
 
ماخنتك بحاظري وشلون بالماضيات
ابي قديمٍ مضى في حاظري يستمر
 
بعد الغياب التقيتك ياشبيه الفرات
ماعادني مندمر لو كنت بك مندمر
 
اللي تملّكه حب الذات عاف الذوات
واللي عمر ماهدم واللي هدم ماعمر
 
سولف عليّه وابسمع منّك السالفات
امرر اللي تبيه يمر لو ما يمر
 
يادربي الاول ويا أجمل الامنيات
يابهجةٍ لا خطرت تغمر كياني غمر
 
صحيح منته بفذة تمر بس الحيات
تخلي ايام عمري مثل ( فذة تمر )