يالله ياللى مالي إلا أنت رباّ.

يالله ياللي مالي إلا أنت ربّا
ربّ المشارق كلها والمغارب

تفرج هموم فالحشاء ما تخبّا
من حرها تشبه سموم العقارب

أحس وسط الصدر نارٍ تشبّا
عفت المأكل عقبها والمشارب

وغديت لعبه بين (بابي) (وببّا)
حتى الفلبين اصبحوا لي أقارب

وتعلموا فيني جميع الا طباّ
وأنا اتراعش مثل فأر التجارب

مثل الصغيّر باليدين اتحبّا
وابلش بلبسي للحذاء والجوارب

لو أغبي الضيقه ابد ما تغبّا
كني غريق البحر من غير قارب