هلا يا أول الميزان

صباح الخير يا وطني مسائك فل ويا خزام
نخيت الفكر والهوجاس وجيتك بالغلا فرحان

مثل ما قالوا ابن الوز على أهله يجي عوام
وأنا عمت بغلاك وغصت وجبت اللولو والمرجان

أطيّر في السما سربي ويجيني الشعر كالإلهام
ارقّص لك حروف الشعر واغنيها على القيفان

هلا بأفراح دولتنا هلابك والفرح حوّام
هلابك مرحبا مليون هلا بك يا أول الميزان

سعودية بها شعب (ن) سعودي هو ذرا الاسلام
يحق لها الفرح تفرح على مر الزمان ازمان

ألا يا شعبنا الغالي ألا يا شعب ما ينضام
تعيش اليوم في فرحة وتشكر خالق الأكوان

على نعمة امن دامت بعد ما ضاعت الأحكام
ولا تنسى ابد تذكر قبل توحيدها وش كان

وتذكر يومها كانت تون بكثرة الآلام
وتبكي من مواجعها وقل الدين والإيمان

بها نهب وقتل وازرت تداوي معظم الاسقام
ثقيلة من ذنوب الناس يدنسها فعل خوان

تفرق شعبها واصبح بلا حاكم ولا حكام
وصارت تشتعل فيها حسد واحقاد كالنيران

قبل ما ينولد ذا الجمع سمعنا بقصة المقدام
قريناها وحفظنها وعرفنا فزة الشيهان

سمعنا عن اخو نوره صبر أيام تلو أيام
ولكن الصبر ينفذ وحبه للوطن بركان

يعد الوقت من وقته ويمضي من الزمان اعوام
وهو يسمع انين الارض تنادي فزعة البدوان

من اول شرقها للغرب تنادي وثبة الضرغام
يصيح الحفر من ضيم (ن) لحقه وينتخي نجران

ونجد الغالية تصرخ وتنخى من البشر جزّام
تنادي من يحررها ويغير هيئة العنوان

سمعها فارس (ن) قرم (ن) وجاها حافي الاقدام
سمعها من بعيد وقال : فداك الروح والاخوان

تشوفه لابس (ن) مشلح وعلى راسه يحط عمام
بسيط بمظهره لكن علشان الوطن ذيبان

يفز من الكويت لنجد يسابق غفوة الأحلام
وجاها معلن (ن) حربه معه بندق وفوق حصان

نصاها مؤمن (ن) بالله يطهرها من الأثام
يلم الشمل ابو تركي .. يوحدها مع الفرسان

وصار عداه من لا طال عنب طايف وتمر الشام
توحد شعبه وأرضه وشافوا من السعد ألوان

حكمها بشرع رب الكون وعلاّ راية الإكرام
نشر فيها الكرم والطيب اخو نوره عظيم الشان

جمع اشتاتها وصارت سعودية وفوق الهام
سعودية بها اطهر بقاع الارض والاديان

تسلسل في حكم دولة عظيمة أرفع الأسنام
تولى الحكم ( أبو خيرين ) وصار الخير له نيشان

سعود اللي غدا همه يرسي العلم والإعلام
وينشر في الدجى نوره ينور ظلمة العميان

وسلام الله على فيصل محنك في السياسة وسام
حكم ارض الجزيرة بعدل ونحاها عن العصيان

وقف بين العدو اعزل واعلان قطع نفط الخام
وجاه الغرب ويا الشرق معلن طاعته خسران

وجاء عهد الرخا والخير عهد (ن) يقهر الأقزام
عهد (ن) خلده ذكره ( أبو بندر ) كما الهتان

يغيث المستغيث ولا يهمه من البشر لوّام
خالد في الشدايد سبع .. وخالد في الرخا انسان

وتلا ذا العهد عهد العز عهد الخادم المقدام
ولقب نفسه بخادم بيوت الخالق المنان

من اول عهد لآل سعود صاروا للحرم خدام
تفانا في بيوت الله ووسع في الحرم بنيان

ابو فيصل جمع كل الخصال وشدها بخطام
عسى فهد العروبة في جنان الخلد يا رحمان

وبايعنا ابو متعب خصيم (ن) للعدى لطّام
حبيب الشعب من طيبه تحبه في الفلا اغصان

سلك نفس الطريق اللي رسمه الوالد الإمام
نهج نهج(ن) ابد ما يتقنه غيره بلا برهان

وضع لبنة مشاريع(ن) عظيمة نفذت باحكام
نهض بالمملكة فوق السحاب وهلت الأمزان

بعد ذا العهد جاء عهد(ن) سحق ايران والاعجام
وبايعنا سليل المجد سيف(ن) للوطن (سلمان)

نحر مولودة الإرهاب نحرها في المهد بحسام
نعم والله بمليك العرب غدينا بأمن واطمئنان

صليب الراي من أصله خواله والعمام أعمام
إلى منه حضر شيهان تفضا ساحة الميدان

نحبه من صميم الذات لأنه عادل (ن) عزّام
يحب الأرض ويا الشعب وشعبه به ترا كسبان

وأنتي يا بلد يحفظك ربي الواحد العلاّم
يصونك من حقود ونجس ومن سارق ومن طمعان

وتبقي يا بلاد الخير أبيه في الملا قدام
يا لبى اسمك على رسمك يا لبي ضمة التحنان

لنا وقفه مع أهل الأرض ألا يا موطن الإلهام
سعودية بها نفخر إذا مدت تمد إحسان

يغطي خيرنا الدنيا وتعجز تحصره أرقام
لجل فينا الكرم والطيب وخوف الواحد الديّان

نحبك يا بلد والله وحبك فيه ما نلام
لجل ربي يوصينا بحبك والغلا ادمان

فرحنا اليوم ما يوصف ولا تكتبه حتى أقلام
لأنا شعب ما يعشق على معشوقته أوطان

وأخر ما مضى كله سلام (ن) والسلام ختام
وعذر (ن) كانها أبياتي عليلة أو بها نقصان

الرياض 22 – 12 – 1437ه