مهداه للنقيب ناصر الزهراني

ماكل من شال الرتب للثناء نال
ولا كل رجال ٍ تنومس فعوله

وناصر عطيه مرتفع بالرتب عال
طيبه يبين بكل صوله وجوله

عطاه فعله بيننا قدر وإجلال
والمنطق الطيب مطيب قبوله

زمالته لو تنشرى بروس الأموال
كل ٍ شراها لو يحت محصوله

يا ابو رنيم من الشعر جاك فنجال
تستاهله والناس مثلي تقوله

لو سقت من كيف القريحه لك ادلال
اللي بصدري عنك ماهو بحوله

تعبير موجز في جزيلات الامثال
مع وافر التقدير جتك امحموله

لعل يفدونك مقاريد الانذال
اللي يعدون الرخامه رجوله

احد ٍ إليا سولف تقل هرج دلال
ونظرة عيونه ماتعدت حثوله

واحد ٍ يحسب العقل في كبر الازوال
والرجل لولا العقل مافاد زوله

ولا كل رجال ٍ نسميه رجال
اللي يعرف العلم يعرف اصوله

واسلم سلمت ودمت ياطيب الفال
ياراعي الفزعه حفيد الزحوله