جميع المجالات

سيّر على ربعك ترى الطيب مامات
لاجيتهم يمكن تعود الزياره

لَلْهَمْ في وجهك رسوم وعلامات
رجلٍ بليا ربع ذاق المراره

ولا ذقت من ربعك كثير المعانات
خل الأجانب في حياتك تجاره

وإن ضاق صدرك من جميع المجالات
هَوِّن وهَوِّنْها وصل إستخاره

ياكم شخصٍ همه الجار بالذات
وياكم شخصٍ هاضمٍ حق جاره

لا واحسافه يا رجال المهمات
الجار حق الجار سوق البشاره

ماهو بتطويل المشاكل والأصوات
ولا بتزويد الإثاره إثاره

وش فايدة عمرك بصوله و صولات
ما للذنوب إلا غسيل وطهاره

ولا شفت بالدنيا كثير المتاهات
إرجع لبيتك لا بغيت إستشاره

أبوك حلال الأمور الصعيبات
وأمك وأمك لا تخلي قراره

وأخوانك سيوفٍ تلامع شطيرات
لا إحتجتهم كلٍ تقادح شراره

وإن كان لك فعل تسميه فزعات
لا تذكره دامك تبي الطيب شاره

كم واحد ذكره مشيد ليا مات
وكم واحد ميت ولو شب ناره

وصلو على محمد كثير الصلاوات
اعداد مادار القمر في مداره