قالت بجي

قالت بجي : وعدّى على قالت شهر !
وانا على ماقالته .. مشغول بال

صدري .. حنين وضيقة انفاس وسهر
وعيني قصايد حالها المكسور حال

وشلون بقوى غيبتك .. وانت النهر
اللي يصب في عرق قلبي .. من شمال

تعال وارويني من وصالك مطر
ماتسمع الصحرا .. تناديلك تعال

غيبتك ماهي سالفة فرقا بشر !
غيبتك فرقا روح .. اوطان .. ورجال

تسوا في عين عويشقك نون النظر
ريح الشمال .. بعيّن سكّان الشمال

مدّة فقيرن يعطي الناس الفُقر
آحساسها في قلبه يهدّ الجبال !

نسمه هوى تداعب اغصان الشجر
في عين من يهوى ..تفاصيل الجمال

كل الليالي في غيابك من شهر
الله وكيلك .. كلّها ماهي ليال