جعل فالبرق خير

أبرقت قلت : يالله جعل فالبرق خير
يوم خلته بنورٍ من هناك وهناك

والله ان كّن نوضه في عيون الضرير
مثل شعّاق شمسٍ منويه بالهلاك

واثرها جيّتك ياللي يكّن الضمير
والمعاليق دونك والحنايا وراك

جابك الوقت ولاّ جيتني مستخير
غير يامرحبا والله يحيي نباك

ياصغيرٍ خذاني له وعاده صغير
كّل مالدّ صوبي قلت اخذني وهاك

ماعطيتك ولا لي فالعطايا شوير
لكن المعطي الله وأشهد انّه عطاك

لين مريت في حلم الغني والفقير
وأن تحققت جعل الله يحقق مناك

والله ان عاد قدرك في عيوني كبيرٍ
كان تدري بقدرك عندي ومستواك

جاك شعر الفرزدق في معاني جرير
صغت حرفه وقافه واقبله يوم جاك

يالحجار الكريمه يالذهب يالحرير
يابريق الجواهر عزّ والي سناك

انت بشت الولايه وانت تاج الوزير
وانت كل البيارق رفرفت في سماك

وانت رمز الجنيه و وجهه المستدير
وانت شارة شعوبٍ كلبوها فداك

وانت الاوّل وكّل الناس وانت الاخير
غاليٍ والغوالي تنقصر من غلاك

الحلا عند غيرك بسّ فيك انت غير
في عيوني حلاك ومابه الاّ حلاك

حارت شبوح عيني والنظر مستحير
عين تشبح مليك وعين تشبح ملاك

مدري القرب منّك برد ولاّ هجير
ويش ابي والله انّي مابي الاّ رضاك

كان لاشفت زولك صاح فيّ النذير
يستر الله عليك ويدفع الله بلاك