يا رب

يالله والعمر بامرك تكتب آجآله
والموت بعده حياه ونارن وجنّه

كان الموادع رسم جالي مع جاله
ودّعت نفسي ولا لحدن معي منّه

غير العزيز العلي يمنن وننصى له
له قولنا والعمل والفرض والسنّه

الناس وقت الموادع تندب الحاله
وانا وداعي بَلا ضحكه ولا ونّه

هذا مع عمّه ووهذا مع خاله
والجرح يعزف على اوتار البكى فنّه

اصعب شعور ( آدمي ) فقدان آماله
في ليلتن كذبها يغلب على ظنّه

مثل الذي غايته يطرد ورى ماله
وما هو ب ينجيه دولاره ولا ينّه

يا ربّ والكون فيه الناس محتاله
والغيبه اضحت على يمكن ويمكنّه

تصبح وتمسي وهي للهرج نقّاله
عصفور عشّه خرابه من كثِر زنّه

اللي على عاتقه وزره ولا شاله
ما حنّ قبره من الاوزار ما حنّه

واللي على صافي الاعمال منزاله
ليته نوى بالعبادة عنّي وعنّه

ياربّ عبدك غروره قطّع احباله
وانت الذي تعلم الخافي وما اكنّه

انا اللي املت ذنوبه صفحة اعماله
وانا اللي اخطى على نفسه وهي منّه

احكي عن الغير واشكّك في اقواله
ومدري فيَ النار أنا وإلاّ فيَ الجنّه