في عيونك حرامي ...!

قالت علامك قلت مدري علامي.
شيئا ملكني ...! فتق الجوف فيني.

يمكن محبه .... مع جنون وهيامي.
او ضيقةٍ ..... تكتب بقايا سنيني.

في غيبتك مشغول فيك اهتمامي.
وفي ساير اشيائي لقيتك تبيني.

اسمك بعيني ماهو مثل الاسامي.
دايم على لساني بجيمي وسيني.

قالت محبه ... قلت ماهو كلامي.
قالت كلام القلب .. تقراه عيني.

الشوف كنه في عيونك حرامي.
قيدني اعجابه ...! سرقني حنيني.

قلت الله اكبر .! ماقريتي سلامي.
قالت قريت اللي ( تبيني تجيني).

فيك الشموخ اللي يعانق منامي.
وشفت الأمان اللي ينادي وتيني.

قلت الصراحه لو ذبحني غرامي.
ترى الرجا بيموت بينك وبيني.

من حبني ياصل مقامه مقامي.
عيني ذراه.! ونبض قلبه عويني.

واللي جهل درب المحبه ينامي.
صعبه على مثله خفوقٍ ثميني.

قلبي عنيد ..... وبالمحبه نظامي.
واللي بلا دستور لا يحتريني.

شاعر يحس وكل مافيه سامي.
عايش زمانٍ كل مابه ونيني.

الشعر له فكري وبصمة ابهامي.
إما رويت البيت وإلا رويني.