الحب حياة القلوب

الله من قلب نصحته وعيا يافهد
والله من قلب رجع في هيامه من جديد

شاف غزلان تمشى وهو ماله كبد
قايدتهم تسلب القلب والعقل الرشيد

ارمعت له في مزوح وقال ابكي حمد
شخص تايب صعب نوله وله قلب حديد

قالت جعل امحق علوم علينا ياولد
عصرك الماضي نرده يذا القلب البليد

وارسلت لي اسكود طاير مع عشر ضمد
وانا ماعندي دفاع وعزي للوحيد

نرت منها ابغي السلامه وادور لي مدد
واثرني غلطان والسير يمه يستزيد

طحت في غيه وحبه وانا مالي جهد
كون قولة ارفق ارفق ترى مالك ضديد

ثم اخذني قايد الريم بحكم مستبد
وارجهن القلب صوبه يفعل به مايريد

لاهرج لي كل جسمي مع اطرافه برد
وان ضحك لي اونس الموت كنه بالوريد

فيه غنج يجعل اطراف جسمي ترتعد
وعنده علاج المهايم على احسن مايريد

ردني في عصري اللي مضى مني وقعد
وانتهضت ارقى مع الجو قرناس عديد

عارف زول ابرق الريش يهواها عمد
ان تعلت جو والا على قاع وحيد

ماتزوزعه الحمامه مع زول الصرد
غايته منتوقة العٌرف لاقفت من بعيد

يافهد والقلب مني غدا وانت السند
ماهو بيدي يوم رديت في عهد جديد