أرض الرسالة والشعر له رساله

أغلا وطن واجمل وطن بين الاوطان
أطهر بقاع الارض أرض .. الرساله

والله ما نرضى مع الوقت ينهان
مشربه صافي ما تكدّر .. زلاله

اليوم لا لرهاب من وين ما كان
يقدر يشوّه به معالم .. جماله

ارهاب ماله شرع في كل الاديان
بذرة فسادٍ ناميه في سلاله

سعوا لها من للهدف جوّ نيشان
عاشوا حثاله والنهايه حثاله

تسترّوا بالدين والدين له شان
السلم والاسلام .. أكبر دلاله

القتل ما هو سلم من عنده أيمان
الله فرق بين الحرام .. وحلاله

الدين واضح ما تغطيّه الالوان
واضح بشرع الله .. جّل جلاله

والشعب ما ينغر بشعار واعلان
مع راية التوحيد تمشي رجاله

لا ثوّر غْبار الفتن كل شيطان
بأمر الولي ناقف ونعلن زواله

في وجه ذا الارهاب ميقافنا بان
ميقافنا به عقل وايضاً جهاله

في صف واحد وقفه بْكل ميدان
حنّا جواب لْمن تحيّر سؤاله

وقفة شرف تشهد بها ازمان لزمان
من جاء (معزي) وجوك بعده عياله

(سعود) ثم (فيصل) و(خالد) كحيلان
حديثنا عنهم يعطّر .. مجاله

و(فهد) .. (فهد) .. فهد العروبه إلى شان
لا شان علم يجيك مرخي حباله

هذاك ابو فيصل مروّي شبا الزان
عوق الخصيم وعز منهو عناله

و(عبدالله) اللي لا غشا الجو دخان
وين انت ياللي تحتمل لاحتماله

من غير ابو متعب ويمناه (سلطان)
على مسار المجد تمشي .. رحاله

تنهان نفس ولكن الدار ما هان
من فضل ربٍ فيه رسّى جباله

أختار له بين السلاطين سلطان
(معزي) ومن بعده تواصوا عياله

ولجل الوطن يزهى الشعر كل تيجان
ب(أرض الرساله) و(الشعر له رساله)