سر خطير

النوم طارت طيوره من عشاش النظير
والروح مزع ستايرها مقص الدهر

وسيل العباير من امزان المحاجر غزير
اغسل به اعمق جروح الخاطر و لا طهر

دون الخفا كيف اقفل باب حبس الضمير
يوم احترق ثوب صبري من لهيب السهر

لو كان لي درب حيله وين دربي واسير
ولو كان قلبي حديد من شقاه انصهر

سته و عشرين عام يالله ابك استجير
يشهد على كثر اذاها سدي اللي ظهر

عمر الفرح في نكدها لا حسبته قصير
ان ما قصر عنه ما ظن يتعدى شهر

مرت و طافت ولا ادري بعدها وش يصير
قيظ وسموم و ظما والا ربيع و زهر

ما كنت اظن الزمن يبغت ولا له نذير
حتى ثنالي على غفله طعون الظهر

وما كنت اعرف ان ورا دنياي سر خطير
حتى تحول من اخطر سر لاعظم جهر

اثر الهوى لا تمكن من خفوق الغرير
دمر ضلوعه وعمر لوعته وازدهر

وين اكتمك يالغرام اللي كتمته صغير
لو يبطي الشوق مغمور زمان اشتهر

يوم ان مجاهيم صدك صوب عيني تسير
حاولت عن شوفي اقهرها ولا تنقهر

يا صاحبي لو بقى لي خيرة باستخير
بس الأمل من عذابه صاح غبن و قهر

ولو لي مع القلب قلب او لي قلوب كثير
من خاطب رضاك لاجل رضاك خذها مهر

اباسألك حاجتي دامك عليها قدير
والسائل ان ما عطي ما سال ما ينتهر

ان ما تهيا وصال به محبك جدير
وش ينفع العاشق اللي بالجمال انبهر

هاك النهر لا وقف بيني و بينه خفير
ما بل ريقي وقوفي بس اشوف النهر