الوظيفة.,

الله ياابو سامر يجيب الوظيفه
اللي تكفيني عن فلان وفلان

لو كان وقتي مااشتكي جور حيفه
الحمدلله دامكم ليّه اخوان

مرهي على الجزلة وراس المنيفه
رقيتها بإذن الولي عالي الشان

لكن ترى البرّاق يجذب رفيفه
متعب قدم ساقي على شوف الاعيان

يالين عنه العين صارت كفيفه
مغير اشاهد مقطع الطيف لابان

لاراح يوم اقول خيره رديفه
والعلم صار اليوم بين إذن وإلسان

هب الهوى والدوح نسمع حفيفه
وقام يتطرق بالهوى مطرق البان

وثارت قنابل تشبه اللي بحيفه
لكن تعدّت مالمست ضلع ورقان

اللي تبا الميراد ترجع معيفه
كسبان راس المال محسوب كسبان

وإلا وطى البرّاق كد زام ريفه
من يوم راح البرق والودق هتّان

متى تجي بديلة ام السفيفه
نقطع بها للريف من عقب ماحان

هذا مصيفي. كل شخص ومصيفه
والرزق عند اللي ليا قال كن. كان

لكن إليا حصلت ليّه وضيفه
عطني خبر . تراي حاضر من الآن