الجدي وسهيل

البارحه جريت بالصوت سجَّات
من ضيقتي سجيت بعض المواويل

لا وا حسافه يا زمان الحسافات
ليام غبراء والليالي غرابيل

يا موخذٍ (ن) عنَّي النظر انت بالذات
من علمك طعن الرهاف المصاقيل

بنيت لك فوق السويدا مطارات
حطيت لك في داخل القلب اساطيل

هذا الزمن كان الزمن فات ما فات
والعالم الله ما يقع بالمقابيل

يابو رغد لا جات ون كان ما جات
دمع المحاجر ما معي له مناديل

يا من تسوقون الجُمل والعبارات
يامن عن اخبار الحبايب مشاغيل

حنَّا بني الحارث رجال المهمات
حنَّا الرجال مطوعين الرجاجيل

اهل العوايد والكرم والمروُّات
ما نستمع لمروج القال والقيل

حنَّا بميدان الحرايب قيادات
حنَّا سلالات القروم الحلاحيل

حنَّا رجاجيل الوغى والبطولات
حنَّا بظلمات الليالي قناديل

حنَّا صناديد الحروب الطويلات
ولا نحسَّب كم خسرنا مقاتيل

حنَّا لنا في ساحة الحرب صولات
نشرب من احواض المنايا فناجيل

حنَّا الركايب عند حَمل الثقيلات
متى اقبلت سود الليالي المحاميل

يشهد لنا التاريخ في كل لوقات
هاك الثرياء ونشد الجدي وسهيل