سر ياقلــم

سر ياقلم وصخّر القاف تصخير
واكتب عن اللي صار وقته شحوحي
**
ازريت اسلّي خاطري بالتفاكير
ومحدٍ على شكواي يسمع ويوحي
**
البارحه كني على قمَّة النير
اجر صوتي فوق عال السفوحي
**
هي ضيقةٍ بالصدر لكنها غير
والموت كنّه يم صوتي يلوحي
**
يا زَين ياللي لك مودّه وتقدير
شفني كسير الحال دونك انوحي
**
كل من نشدني قلت له حالي ابخير
وانا على فرقاك صبري لحوحي
**
صورت لك هالشوق باحلى التصاوير
ارجوك تكفى لا تبدد طموحي
**
بيني وبينك ماتفيد المشاوير
ودّي بقربك لَجل تبرا الجروحي
**
ماظن مني جاك زله وتقصير
وملكت لك يازين قلبٍ سموحي
**
ان كانها جارت علينا المقادير
بصرخ واقول للروح..ياروح روحي