وين الفرح بالعيد

ناس فرحت بالعيد ويا الموالين
 
.... وناسٍ مع الاحزان تشكي من الياس
 
ياعيد للفرحه رسوم وعناوين
 
.....وأنا عناويني معك ضيق واتعاس
 
ياعيد لو لي معك ضحكة حجاجين
 
....ماكان قطع حزني احدود الانفاس
 
وين الذي بالعيد نفرح معه وين
 
...تحت الثرى أصبح مكانه عن الناس
 
من غاب عنا والدمع يسكن العين
 
.... ماتت مشاعر من فراقه والاحساس
 
شقيقتي..هذا فراقك سكاكين
 
...تقطع شرايين الحشا وتضعف الباس
 
طعم السعاده ماعرفته من سنين
 
....ولالي على شوف السعاده تنوماس
 
يارب يامعبود يامقضي الدين
 
.... تكتب لها رحمه ونورٍ بلا قياس