هذا وطنا

لاتحسبون الوطن من هاز له رازه
نهج العقيده وتوحيد الله حصونه

هذا وطنّا ودين اللّه بروازه
مانسمح بشبر في داري تعدونه

هذا وطنّا وجنده موعد العازه
جنده رجال ٍ تبيع النفس من دونه

جنده رجال ٍ تنول العز وإحرازه
هم نبض قلبه وهم درعه هم عيونه

وحنّا مع جنوده سواء في ضد من هازه
نصف صف ٍ وفا للدار مظمونه

نصف صف ٍ ولاء القلب إيعازه
ونزلزل أركان أحلام ٍ تشيدونه

مهما تهيم النوايا نبدد ألغازه
مهما رسمتوا هدفكم نهدم ركونه

نجي على رجولنا واللي بعكازه
دين ٍ إذا حل وقته روح مرهونه

نعطي دروس ٍ لكم ولمنهو إعتازه
واللي ترى غرّكم ماصابت ظنونه

روحوا لمن غرّكم ويعزي إنجازه
روحو له أذيال الهزيمه له تجرونه

في دارنا خط ٍ أحمر منهو اجتازه
نجعل له الراس في معزل عن متونه

دار ٍ بمكه وطيبه ربي إمتازه
شِلّت يدين ٍ لها التخريب ينوونه