الطـيـر

يا(ضلع ) جيتك زابن ٍ وسط خوفي
مثل الذي يزبن عن النار / بالنار..!!

تبرد ضلوعي / واللهب في كتوفي
ماطيق سلمي وآتحاشى عن الثار

يا(ضلع) تاقف دون ( شفّي ) صفوفي
مثل السواد اللي يمسّي على الغار

لا الحظ يرحم / لا المسافة تروفي
ما دام طيري دونه أقفاال / وأسوار

حسبي عليهم ما كفاهم وقوفي
وسط الهجير أزمان / والطير ماطار

يا (شح) سقف الغيم يومي شغوفي
جفت عروقي / والسما مزنها جار

وعذوق صوتي ذاويه حول جوفي
ودونه نبت (شوك) المفارق والاضرار

ماحد(ن) جنًى صوتي / وقدّر ظروفي
يومي أنادي الطير في وكر الاحراار

وما كنت ( أعدّك ) واحد ٍ من ضيوفي
يا(همّ) / دام البعد طاغي وجبّار

أوّل تبارى صوب كفّي سيوفي
واشب قطن الغيم في وسط الاسفار

وتهلّ قبل الديم / أسمى وصوفي
تحتي بساط الضحك / له عدّة ( اشبار )

واليوم مابه بالمصايب عطوفي
لون الطعون ( الزرق ) وسطي لها آثار

والخووف خيل ٍ صعب / بيدي معسوفي
والبندق اللي ( صام ) يذبح اذا ثار..!!