العيد الحزين

قالوا: لفا العيد ، قلت: إش فيه فايدني
قالوا: لي إفرح ، فقلت: بمن؟ ومن معنا؟

من يوم راح الحبيب اللي يعايدني
ما للفرح في حياتي طعمٍ أو معنى

خيّم عليّ الأسى ، والحزن عاهدني
وودّعت فرحي معه من يوم ودّعنا

أجاهد القلب ، وهمومه تجاهدني
وأضمّ طيف الأمل لو كان يخدعنا

ولا لي سوى الشعر ، في نظمه يساعدني
وأسليّ العين في شوفة مرابعنا

وأسأل عنه من لقيت ، ومن يشاهدني
وأرفع مواويل حزني ، ليت يسمعنا

متى الليالي تردّه ما تكايدني ؟
ومتى على خير رب العرش يجمعنا ؟

يا صاحبي لو يطول البعد واعدني
حدّد لي الوقت ، وباقي الأمر له دعنا

وأجيك أنا يا حياتي لو تباعدني
وأقطع مشاوير بُعدٍ كان قاطعنا

وبك تهتني العين مهما الوقت عاندني
أنته ، وأنا ، والهوى ، والعيد رابعنا

وأعايدك وأنت يا الغالي تعايدني
يا اللي حياتي بدونك ما لها معنى