يا رجــم ..

يارجم وإن جيتك ترا خابر(ن) فيك
شي(ن) يسلي خاطري كل ماجاك

بالليل الأظلم لا تمنيتك أجيك
ما تنفهق عنك خطاي وتعداك

بك حكمت(ن) للناس مابار عاليك
ماغير طول الزمان وتناساك

ثابت وشامخ باقي(ن) في أراضيك
لو العواصف كل يوم(ن) تقفاك

ياهيه شوف الرجم عن ويش ينبيك
ياللي نكرت اللي من الجوع عشاك

أدري تمنا يختفي كل ماضيك
وتعيش مع ناس(ن) ما تدري بمرباك

الكلب لأطعمته ترا ما يعاديك
وبعض البشر لأحسنت له شر يجزاك

يموت في غبنه ولاشي ياتيك
والموت لو بيديه ياسرع ماأرداك

سبحان ربي وقت والله يخليك
تعاف فعل الخير وإن حل بحماك

يارجم ذا مسلاي لا جيت ناصيك
شوفك يريح خافقي كل ماجاك

وإن طال عمري كل حزة أبا أجيك
أنت الوحيد اللي على خبري القاك