بخارج غلاف الجو

بخارج غلاف الجو نرسل تحيّة
سلام جوّي فوق حد السحايب

لأصحابنا اللي قايدين السريّة
سلام صافي ما تشوبه شوايب

يا طيبهم يوم الليالي شقيّة
يستعرضون ارتالهم والكتايب

مناورات البر والمدفعيّة
يغرني فيها وميض اللهايب

حنا سلاح الجو عز وحميّة
وحنا ستار اللي تكد الذوايب

وحنا نشرف بدلة العسكريّة
وش عذرنا منها بوقت التشايب

يوم الغزو يوم الظروف العصيّة
طلعاتنا سرب وراء سرب آيب

بقيادةٍ للفهد.. راع الحميّة
غارات جويّة تبيد الكتايب

على العدو نغير والنار حية
أرتالهم من فعل ربعي عطايب

اذكر فعايلنا ولا هي خفيّة
يعلّم الحاضر بها كل غايب

الله يعزك يالكويت الأبيّة
أرواحنا من دون حدّك وهايب