ضيقة الصدر

كلٍ بياخذ من اللذّات مقسومه
لو إيتقعّد له اللي مربحه .. مكره

والله يعين الذي ما يعمل ليومه
طامع فبكره ويمكن موتته؟! بكره ؟

مايدري إن خطّه الأقدار مرسومه
بيد الذّي لا طواه الهم .. يفتكره !!

العبد ؟؟؟ بيموت لو إيحقّق إحلومه
والرابح اللي بتتبع ( ونعم ) ذكره

وأنا افعل الطيب باللي تثمر عزومه
ولا أترجي منه لا مدحه .. ولا شكره

والى دريت إن رفيقي كثرت همومه
وإن ضيقة الصدر .. والونّات .. تحتكره

آآتيه كنّي (( مروّع من حلو نومه ))
وأقول أنا لك من الدينار الى السّكره

سكره !! تجّود إبن آدم بحلقومه
في ساعه .. يلف فعله لفه البكره

وإن غاب .. أكلمه .. وآلاغيه .. وآلومه
وآحاول أعرف وش اللي مشغل فكره

لانه سنافي وتطلق وجهه علومه
حرٍ .. حيامه نزيه .. ومجلسه وكره

والى تعنّا له اللي يحسب قدومه
إن ماذبح له قعودٍ .. ذبح له بكره

وترحيبته كم كلمة حب ملمومه
وكرمه موهوب به ماهوب مبتكره

خلقه .. يروم المراجل صدق .. وترومه
حتى زهته ( ونعم ) .. لكن على فكره !!!

والله ما يقرف الطيب من هدومه
الاّ .. الى شاف من غاليه مايكره