يامال الصلاح

الفحي يا ريح .. و المرسول لا فل الجناح
ما يخالف لا لفحتي في جناحه كل ريح

أشهد ان اكبر عقول الناس .. تستخدم سلاح
و أشهد اني عبد ربي .. و أن ابن مريم مسيح

صاحبي سالم .. عسى ماشر.. و الدنيا براح
لا تشكا لي .. على ما قيل (تشكي لي و أصيح)

يا كريم الكف .. والعادات.. يالذرب .. السماح
ياعصابة روس ربعك.. اذا صح الصحيح

أمس مرت قافلة (سفيان) و ازعجها النباح
الله يسامح خطاء الايام يالطبع السميح

ما على درب السعد و العز .. وقفة مستراح
و ما على دفع الديه .. (مشكور يا القسط المريح)

واسع التفكير لا جيت .. وسع لك و زاح
وناقص التفكير لا جيت .. عيا لا يزيح

كانك تدور مشوره فأنا .. ( مالي صلاح )
و كانك تدور تجارب فأنا ( أوقف و أطيح )

وش فرق ذات الحكايات .. عن ذات الوشاح
غير حاجه من عيون الناس عيت لا تطيح

كلهم ظفرات .. و مطيعات .. حلوات .. و ملاح
يالله انك تحفظ (الاملاح) فالوجه المليح!

يا مساند وقفتي .. و النور عنوان الصباح
لا تجادلني ترى ال(بي أم).. ماهي فالجميح

أبتديت اغرر المسجون بأطلاق السراح
و أبتديت أكشف خطط الاقراب .. و أحلل و أبيح

كل ما قلبت في صفحات (مختار الصحاح)
أكتشفت اني مع الايام جاء نطقي فصيح

و أكتشفت ان البجاحات بأسباب أنفتاح
فكر غاوين الحضاره على عالم بجيح

لو بدل يا مال فرقى العين .. يا مال الصلاح!!
كان ما شفنا جهل أنسان ساقه للضريح

أحسن النيه .. و احب الناس .. و أعرف المراح
و أحفظ الكلمه قبل تنقال .. بلسان النصيح

أذكر اني شفت لي رجال في (وضع انبطاح)
من كثر ما نيتي (بيضاء) حسبت انه طريح!!

عالعموم اسلم و سلم .. يا منشور الجناح
و أن لفيت لصاحب البدع .. سلم و أستريح

قل صباح الخير .. و يقول عبدالله فلاح:
وضعي و وضعك على ما قيل ..(لا تشكي و أصيح)