ياسعود

لـ ساره بنت تركي، ، في الحكمه والنصح، 25

ياسعود - ساره بنت تركي

ياسعود شف حالي معا الناس ياسعود
صار الردى والعيب والغدر صايب
 
وصاروا العرب مايعطوا النقص منقود
كنه الوفاء مفقود و الطيب شايب
 
روّضت نفسي عن مشي درب مسدود
ونفوس بعض الخلق زادت لهايب
 
من باع نفسه لجل حاجة ومردود
وش ينفعه لا صار ب أم المصايب
 
ومنهو يعز النفس في زود من زود
ماضيّع ب دربه و كسب الركايب
 
يا سعود يا وجدي على هبّت النود
و علم الرجال اللي يحلّ النشايب
 
من يوزنون الهرج من طيب مقصود
قبل وزون الشعر و اهل الغرايب
 
و لو البشر تزمر و تحشد له حشود
يبقى على المنهاج كنهم قرايب
 
ياسعود تفكير العرب صار محدود
و افكارهم صارت ضياع و نهايب
 
و على العلوم الغانمة باب موصود
واذا انطلب موقف يدوّر سبايب
 
وصار البطل من يفخر بتركة جدود
و هو فعوله جعلها ل الذهايب
 
يطرد ورى الغرّه معه حبل مشدود
و لا تشدّه غير كثر الكذايب
 
وحبل الكذب قاصر ولو كان مفرود
يفضح كثير الكذب دهر النوايب
 
ياسعود يا أبن ابوي ياحيد مسنود
يا من علومك ما عليها شوايب
 
كتبت انا أبياتي بلا نص مفقود
و انا سليلة من يعز النّسايب
 
ابيات شعري والسماء فوق وحدود
اقصى عطارد لين نبتون هبايب
 
ياسعود ماشكي من مجوس ويهود
طبع العرب صاير مخمّج و رايب
#ساره_تركي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر