بين الحفر والصداوي - طلاع حمد الشريفي

هاضت هجوسي عقب سجيت سجات
بفيافيٍ بين الحفر والصداوي

وياليت ماجيت النزول الخليات
بشوفه تجدد جرح قلبٍ شقاوي

في شوفها زادت علي المعاناة
ونااحسب ان شوفه لجرحي يداوي

مريتها وجروح قلبي مهيدات
وعوّدت يطويني من البين طاوي

قمت آتذكر طيب وقت لنا فات
في قرب موضي الخد عنق المهاوي

يوم الليالي بالمواصل هنيات
يوم المفارق ماشكاه الهواوي

ماكنت شاعر يوم هاك الآناسات
ومن عقب فرقاها بدعت الغناوي

وقمت ابدع جزال البيوت الفريدات
وقافي بمعنى الشعر مسقي وراوي

سقت النجايب والهباهيب صلفات
وانا مساريحي بعيدة حراوي

نجايبٍ بالمشي عجله حثيثات
مافيهن الا كل سمحة خطاوي

احيان تقل اوحي صهيل الاصيلات
وعيسٍ عليها لنشامى حداوي

ولو للجزايل والمثايل نهايات
كان انتهت والي ختمها الخلاوي

وانا ركابي ماتعود محيمات
ميرادهن عدٍ قراحٍ رهاوي

وعسر القوافي لامر فكري مطيعات
ولاشدني الا مدح راسٍ حماوي

اسخي بها في مدح زبن الصعيبات
راكز قدم ساقه بوجه الدعاوي

من ربعي الي يدكون الجمالات
سنعوسيٍ بتاع ولا طناوي

وخطوا الردي به ماتمثلت الابيات
ولاني لمدات الهلايم رجاوي

واللي يحسب ان المراجل يسيرات
المرجله ماهي بحلم ومناوي

ماهي لراعي المال واهل الاريدات
المرجله تصعب على كل ناوي

وش عاد لو ان الموارد غزيرات
المرجله ماهي بحوش الغناوي

ماحاشاها راعي الكفوف البخيلات
من الخساره لوهي ريال ذاوي

الطيب من دونه دروب عسيرات
فرجه تبي عزمٍ عنيدٍ وقاوي

مابين مدّات ومابين حطات
مساريٍ من دونها الذيب عاوي

يبغالها هقوه رفيعه وهدات
وشده ليا صكت كبار البلاوي

ويبغالها الي مايحسب الريالات
كف السخاء الي بالمكارم قصاوي

الطيب كسابه صعيب المجارات
بحط الصحن ولا بشب القهاوي

شرواك يامحمد ولابه مراوات
انشهد إنك للمدايح حراوي

يالحاتمي يابو الكفوف النديات
سحاب جود ينوض برقه سناوي

يفداك مغلول اليدين الشحيحات
ماشيف زوله غير وقت الفضاوي

يقول انا عز الاهل والقرابات
ولا ينوجد له باللوازم حراوي

ولا أنت عديت الرجوم المنيفات
وفوق الهقاوي ياكبير الهقاوي

يمناك عدٍ مرويٍ ل المحيات
كم مضميٍ ورده وصدّره راوي

يانسل ابو عافت زبون الونيات
إعقاب ابن جزاع عطب الاهاوي

ذبّاح دمع وذلّة الشمريات
ومنجي دريك بحومة الخيل ثاوي

اليا اشهرو للحرب بيض صقيلات
وتغطرفن شقر البني ب النخاوي

وتعلوا الزهيد قبٍ محذات
كل ابلجٍ يجذب لصوت العزاوي

زف العقاب الصيرمي الروح مهدات
بادنى ثمن ماعد عمره غلاوي

لعيون دعجات العيون العفيفات
لا هلهلن ثم طوحنَّ الغطاوي

يلكد جواده ماترجّى السلامات
الموت عنده بالحياة متساوي

وان قيل متعنصر بتذكير مافات
اي والله إني عنصري وفيه آغاوي

ومن لا افتخر برموز آهله المسمات
جعله صوابٍ به يحير المداوي

اليا افتخر افخر على علم وإثبات
واخو هيا طاريه مع كل راوي

إليا نخي سارت فزوعه سريعات
بعزوم وقرومٍ تحث الخطاوي

جمع اليمن عز الرجا بالملمات
خيالهم للموت عاشق وهاوي

يتلون شيخٍ حاز مجد وبطولات
يدلي كمى يدلي العديم النداوي

الهجن مع جرد السبايا المغذات
كلّت وعزم عقاب ماكل قاوي

في جرته تشبع سباعٍ مجيعات
وتشبع طيورٍ ساقها الجوع زاوي

وحامي شداد الشيخ من بعد ما مات
ماجد صليب الشور زبن الدعاوي

عشير حكامٍ وحلّال قالات
ما استشيخ بختمٍ وبشتٍ حساوي

ولاذل نفسه لجل جمع الريالات
ولاهو على كسب المناصب رجاوي

قدره تعلا عند روس القيادات
ولا جاهم الا بجاه ينهي بلاوي

ماعاش بالدنيا لمال وملذات
ولغير ممشى الطيب ماهو شفاوي

ليا ادلهم خطبٍ عقّده صعيبات
وتقطعت من حلهنّا الرجاوي

تسند لبو عارف وتقفي سهالات
بعرفٍ ياكم هدّا عسيرٍ عياوي

وطيب النبا يبقى حياةٍ للاموات
مات وبقى ذكره كمى عود جاوي

مرحوم راس مجيد الاريا السديدات
ماجد عساه بجنة الخلد ياوي

هيهات مثله تنجذب البيض هيهات
يغني ولايغني غناه الغناوي

الا انت يالي كاسب منه ميزات
وانا احمد الله فيك ماجد بقاوي

درسك تسنيع الامور المهمات
ياللي بدرب العود سقت الخطاوي

وياخو هيا جتك التماثيل مهدات
وانا ادري إنك عن مديحي غناوي

لاشك لك رد الثنا ومدح بالذات
من شاعرٍ في كلمته مايراوي

ولا ودي آطول مضامين الابيات
بامجادكم يكتب قلم كل راوي

يالله عسى عمرك سنينه مديات
وعسى السعد دايم بك يشع ضاوي

والله جعل فينا عموم الشريفات
وفاء لبيت عقاب زبن الجلاوي

طلاع حمد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر