أرجوزة

إن جاك إللي ترضى دينه
وعندك بنت (ن) زينه في عينه

شاور بنتك لحظة في حينه
وأسأل ربك زود (ن) في التخفيف

هات المملك عقب المغرب
جيب الدّف بليا المطرب

رأي العاقل ماهو مخرب
هذا نصحي من غير تخويف

مهر (ن) غالي ما ينطال
وشرط (ن) قاسي ما ينقال

شوف الدّين ميسور الحال
وبارك عرسه من غير تكليف

لا تعطي المتسبّب ولاّ التّاجر
كل(ن) فيهم يحلف لك فاجر

عطها فقيّر لو يسكن ساجر
هيّن مضّى عمره في التّثقيف

وإن رجعت بنتك ويّا قشّه
لا تستانس ماهي زفّه

يمكن تبكي وتندب حظّه
وتحطّ الكذبه ويّا التحليف

ماهو قصور (ن) في تفكيرك
قصدي ظاهر من تذكيرك

بعون الله أنوي تنويرك
وإسمع قولي من غير توليف

بنتك جاها إلّلي جاها
صارت تكره من يبغاها

يلعّن حظّه ما داواها
وكنّه مسجون (ن) في توقيف

يمكن داخل فيها جنّي
ولاّ سحر (ن) هقوة ظنّي

هذا ممكن وأسمع منّي
وغير إللي قلته تزييف

خذ بنتك لمطوّع يقرا
لو فيها شي(ن) ساكن تبرا

الله معكم عسر ويسرا
هذا قوله من غير تحريف

رجل (ن) جاهد لجل عياله
شيّب نفسه قبل أجياله

هذا من قصر حباله
وهذا إللي حدّه عالتسليف

محتار وواقع(ن) في حيره
مدري كره (ن) ولاّ غيره

عسى الله يهدي للخيره
ويلهمكم حسن التصريف