عيوني من عنا الوقت شابت

لـ ممدوح العضيبـاوي، ، في الصداقة والاخوه، آخر تحديث

عيوني من عنا الوقت شابت - ممدوح العضيبـاوي

يامحمد شفت الوضع مافيه مصلوح
مرت ثلاث سنين والعين شابت
 
لو إن صبري من عنا الوقت له روح
تشوف روحه يابن الاجواد ذابت
 
لي مع هجوس الليل ذكرى بها جروح
تسري معي واليا أصبح الصبح غابت
 
وصدري مراكيب الشقا فوقه تفوح
لين الضلوع من اللواهيب عابت
 
ماباقي إلا دمعتن دونها صروح
واخاف لاشافت كدرها استجابت
 
مد الفرح في مقبل العمر مشحوح
والشوك له بأرضي وسوم ومنابت
 
والي يبدي لي من الهرج منصوح
اقول له نفسي من النصح طابت
 
مدري متى برتاح من كثرة النوح
وابقى على كيد المتاهات ثابت
 
بالمختصر وضعي من الهم مفضوح
واحلام عمري بين صابت وخابت
 
وباب الفرج من رب الارباب مفتوح
هو الوحيد الي له الخلق هابت
 
وانا من الضيقات ماودي أبوح
لكن عيوني من عنا الوقت شابت

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر