زرع السلاله - وهاج السلمي

ياجميله غنت الورقى وانا مخطي و تايب
واشعلت قلبي حريق وخلته في سوء حاله

عامليه ب لطف وانتثري مثل وبل السحايب
لاتجيه الريح وانتي ما رضيتي في بداله

كنت رجوى شايبٍ من قسوة الايام شايب
والطواري تطرح العاقل قبل تطرح عقاله

وخاطري مكسور وانتي ثامنة سبع العجايب
ماتحبين الغرور وكبرياك بلا جهاله

احذفي لي عودك الريان من بين الترايب
واتركيني في مجال العنق والا في جماله

وناوليني خمر توت الغصن وشفاتك سكايب
لين احس الكون يرميني جنوبه في شماله

لو دروا قوم الفلاحه عنك جابوا لك عقايب
اسحبوا من توتك سلاله ل اجل زرع السلاله

مفرق النجدين توه مبتدي مبدا الغرايب
خلو اللي في جوار النيل يسقي به حلاله

ولو يغطيه السحاب البدر ما اسميه غايب
وخصرك المنحوت غايب شبر كفي في هلاله

سولفي لي من قريب ودثريني بالذوايب
دايم الشوق الحقيقي ما توصله الرساله

مايصير المر حالي والحلا ماهو ب ذايب
والحلا دايم خلاصة لذته قاع البياله

والاماني ياجميله في يد الفرقا نهايب
بين وصل وبين قطع وبين ميله واعتداله

والهوى قبرٍ وسيع بلا لحود ولا نصايب
والرجاء باللي جمع يعقوب مع صفوة عياله

مايجمعنا بعد من يعطي جزال الوهايب
غير دعوه صادقه من بعد لفظ اسم الجلاله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر