وسيلة نقل - وهاج السلمي

وصلت ريع الموده مع مهب الغرام
وقلوب الاحباب للذكرى وسيلة نقل

اول حياة الهوى بين الحياء والكلام
واخر حياة الهوى بين العتب والثقل

لو قلت معك السلامه تذكر اصل السلام
بدايته في حقل ونهايته في حقل

ما كل عاشق تجي له فرصته ب اهتمام
بالعكس لا طول غيابه تبى تكون اقل

وانا عشقتك قبل واحد وعشرين عام
ولف القلوب البريه ما يبي له صقل

واليوم للوازع الديني حلال وحرام
ولولاه ابدقل معاذير الليالي دقل

الله يا طاري الذكرى وذات التمام
يرقل لها القلب من بين الحنايا رقل

لاشفت خدك عليه من الجدايل لثام
جلست اخمن واحلل صورتك فالعقل

احيان اقول القمر غطا عليه الغمام
واحيان اقول بدويه في يديها بقل

لو ودي الارض اغطيها بريش النعام
عشانها لا نوت ف اطرافها تنتقل

© 2024 - موقع الشعر