ليلة الم

يا مر حزنٍ داخل القلب مخفيه
في ليلةٍ فيها لالم والمعاناه

هذي العيون بصادق الدمع ترثيه
مدري فقدنا الصبر والا فقدناه

والأمر لله .. والقدر منّه .. إليه
على قضاه اللي علينا رضيناه

في فقد من طيبه يخلد معانيه
شيخٍ بشرع الدين والطيب مبداه

لا قبلت صوبه طاري الخير توحيه
متبسمٍ تِبْهِجْكْ طلة محياه

فيه السخى اللي غارسه فيه باريه
فطره من الله في مقامه وملقاه

وخصال ابوه وجده الطيبه فيه
على مساعيهم ظهر طيب مجناه

ومن الشجاعة كل عزٍ مخاويه
هذي تواريخ الفخر ما تعداه

ولو هو رحل وأقدم على حكم باريه
باقي معانا والزمن ماتناساه

في كل محرابٍ تهجّد لواليه
يالله عسى ياخذ كتابه بيمناه

يارب قبره دايم الديم تسقيه
من صافي الكوثر ولا بعد يظماه

والنور تسعى هالته بين أياديه
لباسه إِسْتَبْرَق والاسوار حلياه

ويالله عنا من ربى الخير تجزيه
يارد على حوض النبي ويتهناه