زعفرانك وهيلك - وهاج السلمي

يا ورق مريت وجرحت المحبين
بعثرت جرح فراقهم من هديلك

قبل الغلا ينبت ورود ورياحين
اجتاح نزف جروحهم ظل جيلك

تسبق دموع قلوبهم دمعة العين
ليت الفجر طول منامه بليلك

يا فاتنة قلبي قبل لاتقولين
كل الغلا من خافقي ينتمي لك

يا كوثر الجنه و يا صفوة الزين
ما حصل المشتاق من سلسبيلك

ضماي بين انهار وأقسى الامرين
صابر على جديك وقسوة سهيلك

أيام عمري عقدةٍ ف الحجاجين
وليالها سوداء تشابه جديلك

ليت الطفوله ترجع بعمري سنين
وتجين لي والا من البعد اجي لك

اجيك مافي وسط صدري عناوين
واحكي ولو من الفراغ احكي لك

انا فدا اول سالفه بين الاثنين
منها بدا ضحكك وعدلك وميلك

ما اقسى من مطول سوى قولتك وين
وين انت غايب ..قلت يا قلب ويلك

لو كان قدر المستطاع ولي يدين
جيتك بحبٍ في غرامه يشيلك

يخطفك خطفت من كفخ بالجناحين
و يزيد حيله كل ما زاد حيلك

ويستقبلك نبض الغلا فالصدر لين
تفوح زفرة زعفرانك وهيلك

قلبك كما الصبار حول البساتين
لكن في قلبي هو اجمل جميلك

من عقب حبيتك يحبك كثرين
وقلوب عشاق الهوى تنحني لك

حبيبتي دامك نويتي تروحين
حلفت ما اسج القدم في سبيلك

روحي واذا جاك الوله قولي امين
ماتعلمين بحبك الا خليلك

و انا على عهدي ووعدي وتدرين
ان العمر يفنى ولا اطلب بديلك

حنا عرب ونخاف من هذرة الشين
والا قبل شرح الدموع نحكي لك

© 2024 - موقع الشعر