مرحوم ياللي - رغد محمد السليم

مرحوم ياللي .. هلّوا فوقك ترايب
من كثر ما أبكيك.. يشكون جيره

شفت الكثير وهذي أقوى النوايب
من حدة طعوني .. كأني جفيره

أنهارت الدنيا وأنا أضحيت خايب
يوم أقبل الموت وسكرته لك نذيره

توي صغير وشفت ! شوفات شايب
ومن شدة كسوري.. بحاجة جبيره

ما عاد تملى العين .. كل الوهايب
و ب أقصى الحشا تأج..نارٍ سعيره

لو رحت يبقى ..منزلك بالهدايب
و يوم التجلد ف العزا هو عسيره !

أصبحت أمثل قوتي .. للقرايب
و الله يعلم .. ب أن روحي شطيره

يا ليت موتك لو .. إشارات جايب
يوم ان موتك كان فكرة أخيره !

عقب الصفا صارت حياتي شوايب
وكنّي ب وغى يشتد ..بليّا ذخيره

أصبح ربيع العمر بعدك ..جدايب
كنّي صويب القلب حالي مريره

أجبر لي قلبٍ.. عقب لاماه ذايب
ويعظم أجرك، هي متى جت يسيره؟

يا الله عليه أمطر مزون ..و سحايب
و سخر له الرحمه .. و أجورٍ غفيره

ويا الله ما غيرك .. مجيب الطلايب
يا عل في شوفتك .. " عينه قريره "

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر