الواقع الصعب يقتل حلمنا والخيال
كل شي نقدر عليه الا القدر والنصيب
حسبي على الوقت لاكشر بنابه ومال
لولاه ما ضاق رجالٍ ولاجاع ذيب
وين أنت ياللي قبل فتره تنادي تعال
وش فيك صرت العدو من عقب منت الصحيب
ماكنت أظنك عقب هذا تهد الحبال
لكن صدق من يقول ان الهقاوي تخيب
ياجعل يسقى زمانٍ فيه حب ووصال
يومن موعد لقانا عقب وقت المغيب
أيام زالت ولكن ذكرها لايزال
يومن للحب مرسولٍ يروح ويجيب
ياطاغي الوصف ياسيد الدلع والكمال
يافارع الطول يا كامل عقل يالبيب
الغيد جنبك يجيهن في حضورك جفال
تجفل تحسب الجلوس بجانبك شي عيب
لانك متاهه حلا مدري متاهه دلال
فارقك ربي عن العالم بشي غريب
حتى القصايد تزيد بوصف مثلك جمال
وشمس القصايد بغيرك تنتحي للمغيب
كتبت فيك القصايد والمعاني جزال
وضيقت صدري عقب ماكان كونن رحيب
وصلتني عقب ذاك العقل حد الهبال
وخليتني عقبك أدامن علاج الطبيب
محال تبرا جروحي عقب هجرك محال
مايبري الجرح غير الله وشوف الحبيب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين