دموع الرجال

الهجوس اللي قناديلها مثل الفنار
من وهجها استوحي احلى الشعر واستلهمه

سج معها الفكر من غير قصد وْلا اختيار
وصرت في جو القصيده بدون مقدمه

موقفٍ حرّك شعوري واقوله باختصار
ما يبي له غير نور الصراحه ترجمه

التجارب تعطي الرجل فالدنيا اعتبار
يستنير بنورها فالليال المظلمه

والرجل واجبه يصبر لو ان الحمل جار
وْلا يحاول يرخص بْسوق الانذال اسهمه

حتى لو ضدّته الايام يبقى له شنار
لا يضيّع هيبته لو تضيع الاوسمه

واصعب اللحظات فالعمر لحظة لانتظار
تفِقد الرجل اعتباره وقلبه تجزمه

والقهر كل القهر لا احترق دمّه وفار
وهلّت عْيونه بدمع الغبينه مرغمه

دمعة الرجّال تعني مذلّه وانكسار
لان دمع الرجل في عينه اغلى من دمه

لا اصبح من جور المعاناه كنّه في حصار
وصارت كبده من لظى الهم والغبن فْحمه

ايتمنّى الموت ويسلّ سيف الانتحار
والفجوج الاربعه في عيونه معتمه

ما معه غير الصبر فالصغار وْفالكبار
وفي طريقه ينتبه لا يزل بْه قْدمه

وانت ياللي لك مع اهل الوفا والعز كار
استمع لي يافتى الجود والعلم افهمه

لا تعذر من ضعيفٍ ما يقبل لاعتذار
واللي ما يستاهل المكرمه لا تكرمه

وانتبه لا تصاحب اللي على جوّه غبار
لو تجمّعك المجالس معه لا تكلّمه

الملوحه طعمها غيّر إمياة البحار
والزلال العذب ما اختل لونه وطعمه

ولا تجاور واحدٍ ما عرف حق الجوار
كل يوم يجرجرك عند باب المحكمه

يلبسك ثوب التهم فالطّوال وفالقصار
وتكتشف منه الجفيّا بخطّه وقلمه

واللي على عرض نفسه وعرضك ما يغار
بالنسب لا تحط بينك وبينه ملزمه

حتى لو بالعين تعجبك زينات المهار
مثل ما قد قيل يالظفر خذها بشحمه

وعن لاقارب ودي اعطيك كلمه باختصار
كيّة الاقراب عن كل كيّه مؤلمه

لكن لا شفت الخطا لا تزيد النار نار
عفوك عن زلات الاصحاب حطّه لك سمه

ولا يغرّبْك الزمن ما على الدنيا قرار
وعمرك فيما ينفعك فالحياه استغنمه

قدّم إلنفسك عمل خير قبل الاحتضار
واطلب الله يشملك بالعفو والمرحمه