انا معك في كل ماقلت وتمون - ممدوح العضيبـاوي

لا صار يابن فهاد مافيه قانون
والبورصه ما عاد فيها انتعاشي

الفار نجس وفيه حمى و طاعون
يعدي اليا عرض مع الدرب ماشي

اجاهده واللي معه لين يفنون
اهل القلوب الميته والغشاشي

اللي على طرد القفا دوم يسعون
لعل ما يبقى لهم حي عاشي

واحدهم ان صلى مع اللي يصلون
عود على نهب اللحم والعراشي

ان شاف ولا سمع عن شي مدفون
جسرن على الرشوه ومرشيه راشي

يلقى ضعيف النفس حافي ومديون
يغريه لين انه يعرف الخشاشي

ناسن اليا مرو وشافو يصدون
وناسن تنام ولا تحتها افراشي

يموت ميتهم ولا عنه يدرون
مثل الفراش اليا ضوا الليل هاشي

عسا رجال العرف واللي يعرفون
وهل القلوب الزاكيه والهشاشي

يفداهم اللي فالمجالس ينمون
واللي يناشب حرمته بالمعاشي

درت الرحى للحب والحب مطحون
وماعاد باقي غير حتحت قراشي

انا معك في كل ماقلت وتمون
البورصه ماعاد فيها انتعاشي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر