نيوتن قضى عمره على شان تفاحه

لـ فهد المنصوري، ، في المدح والافتخار، 44، آخر تحديث

نيوتن قضى عمره على شان تفاحه - فهد المنصوري

يازين القصيد اللي من احساسنا منظوم
‎يجدّد نشاط الجسم وينقص املاحه

يخفف عن الواحد قبل تاصل البلعوم
‎ليا سج مع نفسه وغيّب عن امراحه

خطاك العتب ياصدري الممتلي باللوم
‎وفداك القصيد العذب كله بمسباحه

الايام ما خلّت ولا واحدن معصوم
‎مقاديرها تلعب مع الحظ مرجاحه

تحدِر بنا الوادي ونزعل من المقسوم
‎ونرضا بواقعنا ونسعى على اصلاحه

تهون الكباير في عيوني وتصغر يوم
‎الد النظر فاللي عجز يكتم اجراحه

واقول احمد الله واشكره ماني بمحروم
‎مادام الله املبسني الصبر بوشاحه

انا في رجا اللي فارج الهم للمهموم
‎يفرّج هموم اللي طواريه تجتاحه

مطيح الاكابر من عيون الملا مذموم
‎يسبب خلل واضح على النفس فالساحه

اجي مبتسم دايم ليا جيتكم معزوم
‎مقفّل على حزني ورامي بمفتاحه

تشوف(الفرح)دايم على ناظري مرسوم
‎تَحسب(الحزن)ممسوح مني بمسّاحه

لك الله ماعشنا حَلاها سوى في النوم
‎توسّدت واقعها والاحلام طراحه

ليا من صحيت ادور الحلم ب قرب زوم
واشوفه كما طيرن كفخ واسدل جناحه

مغير اتعزّز بالصبر و انّثني واقوم
‏‎كما اللي مشى من باب صنعا على الباحه

تجنّب(دروب مزفلته)خطها مرسوم
‏‎زهابه رجا بالله وإيمانه اسلاحه

يدوّر على رزقه وفي رحلته ملزوم
فرحلة(شقامع كد)ماجاك فسياحه

وقف في طريقه عسكري فالحرس منجوم
وعنما اشتهى صده بعد طال مسراحه

ياليته درى عن صدره الضايق المكلوم
وعن راس مالن ضاع ما عيّن ارباحه

قبل مايردّه(منكسر خاطر) ومهزوم
‎وقبل ما يسلّم محضر القبض ويظاحه

هذي حالتي من عام واكثر وانا مصدوم
خيارتي الصعبه معي ماهي امتاحه

لو الطب ينفع فيك ياصدري المكتوم
‏‎تخلّصت من همّك بدكتور وجراحه

لكني عجزت القا دوى طبّك المعدوم
‏‎لو القا علاجه رحت له مشي وسباحه

عيال الحمايل لو يجي حقها مهضوم
‏‎ترى صدورهم شرحه مرحه ومزاحه

يبان الفرح فيها لوان همّهامردوم
وهي عادة اللي للمواجيب نطّاحه

اخذنا شهادة(جامعه)ماهي بدبلوم
ومن (جامعة صبري)تخرجت وكفاحه

تعلمت فيها بان راع الكفاح يروم
مصيره يولّع في دجا الليل مصباحه

عذوق النخل ماتشبهك ياغصون الدوم
ولاني مقارن مبخرتنا بفواحه

دروب العلا تِتِعب وتوّصلك للمعلوم
اذا خاطرك توصل توصلك بالراحه

ودرب الملّل ضعفٍ وخيبه على المشؤم
‏‎ترى صاحبه ضاري ليا قام بالطاحه

وش الرجل لولا العزم دام الرجال عزوم
نيوتن قضى عمره على شان تفاحه 🍎

#فهد_المنصوري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر