تجارب حياتي - خالد بن عبدالعزيز التميمي

مروا كثير ونوخوا في حياتي
واكرمتهم مادام صرنا معازيب

واحلف عليهم بالعشا والمباتي
هذي مبادي عارفين المواجيب

واقريتهم ماي قراح وشاتي
طبع لنا ماهوب زور وتكذيب

احدن مدح يذكر محاسن صفاتي
واحد جحد يروي عيوب وعذاريب

واحد سمع فيني كلام الوشاتي
واحد لك الله يبغي الحق ويصيب

لكني اعلى من جبال السراتي
واصلب من الصمان وقت اللواهيب

من لان لي لينت قاسي عصاتي
واصير له لاطاب اطيب من الطيب

ومن صار قاسي ماله الاالقساتي
كم واحد تفعل له الطيب ويخيب

من يفعل الحسنة تجيه حسناتي
والسيئة ترجع على العبد بالعيب

هذي حقيقة من تجارب حياتي
والمعرفة تكسب بكثر التجاريب

خالد
الجمعة 1441/4/21هجري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر