العمودي بطيب المرجله ذايع صيته - ممدوح العضيبـاوي

من يبي الطيب ما تعسره الوسيله
كل الصعايب تهون لا منك نويته

وأليا زبنت ازبن رجلن ساد جيله
ما يخيب هقوتك اللي فيه هقيته

ما يقدم العذر من دون القصد حيله
يشوش راسه بالطيب لا منك نخيته

له وقفه ماهي بالمواجيب ذليله
العمودي بطيب المرجله ذايع صيته

وأليا مدحت طيب ما فيها فشيله
مامدحت إلا كفو ماظن حقه وفيته

و بيض الله وجه من وفا بجميله
اللي يقدر رفيقه ويفزع لا جيته

عيد بن خلف يشيل حمولن ثقيله
لا من ضاقت فجاج الوسيعه نصيته

أسوق جاهي وهاقي حملي يشيله
اللي للجواد مشرعن بيبان بيته

لا تزهل وطق الصدر أحتمى حيله
يقضي الصعب بيوم به حياة وميته

لو طيب العرب مات وضيع دليله
ما مات عند عيد وطيب ورث أبيته

وش عاد وهو من روس قومن نبيله
عصلان خلو جموع غازيهم شتيته

احتمو دون ناقه بسيوف صقيله
صغيرهم مثل الأسد أليا بغيته

وسلمان مطير بعد الله عضيدله
له موقف شجاع وقدره ما نسيته

جعل الطيب سنين عمره طويله
وجعل يسلم طيبن لا زبنته لقيته

© 2023 - موقع الشعر