يالله يالخلاق ياخير معبود

رثاء في وفاة / عبدالرحمن محمد الحلوان ( خال الشاعر)
غفر الله له

يالله يالخلاق ياخير معبود
يافارج الكربات نور طريقي

حزنٍ بصدري داخل الجوف مرجود
والهم والتفكير اصبح رفيقي

الحزن بدل.. وضح.. الأيام بالسود
قلت آه ..واويلاه .. جرحي عميقي

من موت خالي جفت انهار وعدود
ومن فقد خالي شب جوفي حريقي

راعي الوصل .. نبع الوفاء..منبت الجود
راعي مواجيبٍ تسر الصديقي

يشهد له المسجد وخلق الله شهود
والجار يشهد له وكل الفريقي

مرحوم ياللي راح ما مس منقود
فعله ينومس كل حرٍ طليقي

يارب تغفر له عدد ذاري النود
وتسقيه من جنات عدنٍ رحيقي

وياعيال خالي طيبكم دوم مشهود
يبين لامنه نشف كل ريقي

البر..فيكم والوصل ترثِة جدود
متوارثين المجد فعلٍ حقيقي

ووصل الرحم لاشك دينٍ ومردود
يالله تساعدنا لحمله نطيقي

وتجعل أهلنا دوم في سهود ومهود
وتزيح عنهم كل همٍ وضيقي

وسنة إله الكون فاقد ومفقود
والموت حق و كل لحظة يويقي

واللي غفل عن جور الأيام مقرود
بقعى تبي تكويه حتى يفيقي

ويالله أنا طالبك والكف ممدود
يافارج الشدات نور طريقي

عبدالرحمن عبدالله المجلي - راعي مرات
11/7/1437ه